Síguenos


O teu Xacobeo

O proxecto “O teu Xacobeo 2021” remata a segunda edición con máis de 550 participantes da provincia de Pontevedra

Share on linkedin
Share on twitter
Share on facebook
Share on whatsapp
Share on email

Por segundo ano, Cruz Vermella e a Xunta de Galicia sacan adiante o proxecto “O teu Xacobeo. O Noso Camiño con Cruz Vermella”. Con esta iniciativa buscouse fomentar a inclusión e a participación activa dos colectivos que atende a Organización: voluntariado, xuventude, persoas maiores, inmigrantes… potenciando o valor do Camiño de Santiago. A iniciativa está promovida e financiada pola Xunta de Galicia e conta cunha aportación de 15.500 euros.

 

Os participantes, que nesta edición foron máis de 550,  percorreron diferentes variantes do Camiño, pasando polos concellos de Pontevedra, Tui, Catoira, Cambados e a Illa de Arousa, entre outros. Foron un total de 14 saídas repartidas entre o 15 de maio e o 25 de setembro de 2021. A última saída fíxose na última fin de semana de setembro e saíron varios autobuses rumbo a Santiago para xuntarse e dar peche á edición.

 

O proxecto tivo moita aceptación por parte dos participantes: “A saída foi estupenda. Repetiría, gustaríame seguir facendo o camiño, así, por etapas. Ir facendo outros 5 ou 6 km, ata terminar o camiño”, comentaba unha das participantes usuarias do programa de persoas maiores.

 

Outra das participantes, neste caso do programa de inclusión, facía fincapé nas ganas que tiña de seguir coñecendo a zona, xa que por motivos do COVID-19 esta era a súa primeira saída turística: “A min pareceume unha experiencia realmente marabillosa, xa que eu levo un ano e medio acá, cheguei cando estaba a iniciar a pandemia e esta é a miña primeira saída turística para coñecer das marabillas que ten Vigo e os seus arredores. Estou encantada e espero que me sigan convidando e avisando das actividades que hai”.

 

O obxectivo destas saídas é potenciar o valor do Camiño de Santiago como unha oportunidade de participación social que promova o valor cultural de Galicia, a través dos hábitos de vida saudables, protexendo o entorno e promovendo espazos de ocio alternativos e interacción social, así como a inclusión dos colectivos vulnerables e o seu acceso aos recursos de ocio, culturais e de patrimonio coma o resto de cidadáns.

 

Concurso de debuxo

 

Dentro deste marco, e como actividade para finalizar esta edición, dende a Xunta e Cruz Vermella organizouse un concurso de debuxo para todos os usuarios de Cruz Vermella, co que pretenden dar a coñecer o rico patrimonio que ofrece o Camiño de Santiago.

 

A temática é o Ano Xacobeo e o Camiño de Santiago e o obxectivo e que os participantes dean a súa visión do Camiño. A técnica artística a empregar é de libre elección e as categorías para participar divídense por rangos de idade: infantil (6-12 anos), xuvenil (13-18 anos) e adultos (maiores de 18 anos). Os gañadores recibirán un obsequio e as obras gañadoras serán publicadas no calendario de Cruz Vermella do próximo ano.

 

Durante o ano 2019 desenvolveuse a primeira edición deste proxecto, no que participaron 434 persoas pertencentes aos distintos colectivos que atende a organización chegadas dende todas as asembleas comarcais de Cruz Vermella na provincia, igual que na segunda edición: Baixo Miño, O Condado, Vigo, Redondela, O Salnés, Tabeirós-Terra de Montes, Lalín e Pontevedra.

 

O proxecto tivo unha gran acollida, e realizouse seguindo as pautas e normativas por COVID-19, gardando a distancia social necesaria para no poñer en perigo a ningún dos participantes.

 

Nesta ligazón podes ver un vídeo coas diferentes actividades do proxecto.

Share on linkedin
Share on twitter
Share on facebook
Share on whatsapp
Share on email