Un total de 620 persoas atopou traballo no que vai de ano grazas ás máis de 1.500 alianzas xeradas con empresas no marco do Plan de Emprego de Cruz Vermella. A través desta colaboración, a Asemblea Provincial de Cruz Vermella na Coruña respondeu á demanda de 2.027 persoas en situación de desemprego ofrecendo formación e capacitación profesional para a súa inserción laboral.
“Non hai igualdade de oportunidades se non existe unha posibilidade real de acceder ao mercado laboral”, subliñou a presidenta provincial de Cruz Vermella na Coruña, Mercedes Casanova, durante o acto de recoñecemento a empresas organizado na Cidade da Cultura. É por iso que, engadiu, “a través do Plan de Emprego de Cruz Vermella, tratamos de incrementar a empregabilidade das persoas en situación de vulnerabilidade ofrecéndolles cursos de formación que impulsen a súa capacitación profesional e dean resposta á demanda do tecido produtivo”.
Neste sentido, Casanova agradeceu a colaboración das máis de seiscentas empresas que, ao longo de 2022, sumáronse ao Plan de Emprego de Cruz Vermella na Coruña a través de proxectos como Reto Social Empresarial e de alianzas en materia de formación, prácticas profesionais, cesión de instalacións, asesoramento e ata mentorización de persoas en procesos de capacitación. “Sen o voso apoio non sería posible avanzar no desenvolvemento, tanto profesional como persoal, das persoas que, por unhas ou outras circunstancias, enfróntanse a situacións complicadas no seu día a día. Un apoio esencial para xerar talento e oportunidades mesmo nos momentos máis difíciles”, concluíu a presidenta provincial dando paso á entrega de diplomas, que contou ademais coa participación dos presidentes das asembleas de Cruz Vermella en Santiago de Compostela e Ferrol, José Luis Barreiro e Carmen Fernández Corral, respectivamente.
Reto Social Empresarial
Enmarcado no Plan de Emprego de Cruz Vermella, a iniciativa ‘Reto Social Empresarial: Alianzas para a inserción laboral’ convida ás empresas a implicarse na xeración de sinerxías que promovan a mellora da empregabilidade e as oportunidades laborais das persoas en risco de exclusión. Conta co financiamento do Fondo Social Europeo e do Goberno de España a través de Programa Operativo Inclusión Social e Economía Social (POISES).
