Síguenos


Máis de 200 persoas participaron no Encontro de Familias Acolledoras de Cruz Vermella en Galicia

Share on linkedin
Share on twitter
Share on facebook
Share on whatsapp
Share on email
Malpica acolleu o pasado 17 de setembro o Encontro de Familias Acolledoras de Cruz Vermella en Galicia. Foi na Finca Aldeola, onde máis de 200 persoas entre adultos e nenos/as compartiron unha xornada lúdico-formativa, na que puideron intercambiar experiencias tras dous anos especialmente difíciles polas complicacións derivadas da pandemia.
No acto de benvida ás familias interviñeron Jacobo Rey Sastre, Director Xeral de Familia, Infancia e Dinamización Demográfica, Carmen Colmeiro Rojo, Presidenta de Cruz Vermella en Galicia, e Mercedes Casanova Díaz, Presidenta de Cruz Vermella na Coruña.
Este encontro foi o primeiro tras a chegada da pandemia, polo que supuxo un momento moi especial. O programa incluíu un seminario sobre o desenvolvemento infantil na contorna da acollida familiar, impartido por profesionais de Neurosens, e un espazo para o testemuño de Isabel García, xornalista e autora do libro “O día que me queiras”. Ademais organizáronse unha serie de actividades lúdicas e obradoiros por grupos para os nenos e nenas participantes, así como para gozar xuntos en familia.
Acollemento familiar
O acollemento é unha medida de protección á infancia que ten como finalidade ofrecer un fogar a nenos e nenas que de forma temporal non poden vivir coa súa familia de orixe; un fogar onde os nenos e nenas reciban todo o coidado e seguridade que necesitan mentres a súa familia biolóxica atravesa unha situación de dificultade.
Cruz Vermella xestiona o programa de Familias Acolledoras en colaboración coa Consellería de Política Social da Xunta de Galicia. Entre xaneiro e xuño deste ano foron acollidos 267 menores en Galicia. Nestes momentos hai 238 nenos e nenas que están a ser acollidos na comunidade autónoma, mentres que 80 están á espera de acollemento; entre eles hai grupos de irmáns e menores con algunha discapacidade ou necesidades especiais.
A rede de familias acolledoras de Cruz Vermella en Galicia está formada por 344 familias, pero sempre se necesitan máis persoas dispostas a colaborar xa que, deste xeito, haberá máis posibilidades para dar a resposta máis axustada a novos casos, tendo en conta as características e necesidades dos menores.
O acollemento familiar é un proxecto vivo, no que non existe unha familia tipo e onde cada acollemento é tan único como os nenos e nenas do programa. Só hai un requisito imprescindible para ser familia acolledora, que é non ter finalidade adoptiva. Despois, o equipo técnico de Cruz Vermella acompaña ás familias desde o primeiro momento e durante todo o proceso de acollemento.
Máis infromación: www.acollementofamiliar.gal
Share on linkedin
Share on twitter
Share on facebook
Share on whatsapp
Share on email