O lixo na actualidade é un problema de primeiro nivel a escala global. Miles de toneladas de materiais manufacturados utilízanse cada día nas diferentes actividades industriais, agrícolas, de produción e domésticas. En moitas ocasións son dun só uso ou terminan a súa vida útil pronto, e son refugados, rotos, repostos ou descartados, polo que finalmente acaban sendo considerados residuos. Aínda que un número cada vez maior deles son reciclados ou reutilizados, estímase que existen micro plásticos en practicamente todos os hábitats do mundo.
O proxecto Libera, de SEO/Birdlife en alianza con Ecoembes, ten como obxectivo principal liberar á natureza de lixo, para o que se organizan recollidas de residuos en diferentes contornas co fin de caracterizalas, unha vez atopadas en diferentes ecosistemas mariños e terrestres. Nesta liña, do 11 ao 19 de marzo o proxecto celebra unha nova edición da campaña ´1m2 contra a basuraleza´, co obxectivo de profundar no coñecemento deses residuos abandonados que invaden os ríos, lagos e encoros de España. Trátase dunha campaña de ciencia cidadá e recollida que trata de loitar contra un problema que non só é estético, senón que xera graves complicacións ambientais porque os ríos son a principal vía de basuraleza ao mar.
Dentro do seu compromiso de loita contra o cambio climático e a preservación da natureza, Cruz Vermella súmase en Galicia a esta recollida con tres actividades que se van a desenvolver en distintos puntos da xeografía. En primeiro lugar, o sábado 11 de marzo recolleranse residuos do Río Gafos nunha actividade organizada por Cruz Vermella Pontevedra. O mércores 15 de marzo será a sede de Cruz Vermella Ourense a encargada de limpar o paseo de Arenteiro – Baixa da Toscaña, situado en O Carballiño. Por último, a asemblea local de Cruz Vermella en Sada realizará a actividade o vindeiro sábado, 18 de marzo, na zona das Mariñas – As Brañas.
Unha vez finalizada a actividade nas tres localidades galegas, os residuos analizaranse para coñecer que tipo de desperdicios atópanse en cada zona. Así, nun futuro próximo, poderase desenvolver unha sensibilización específica que preveña a situación na contorna e permita abordar o problema, cambiando os hábitos da poboación e educando á cidadanía no coidado e respecto a natureza.
