Innovación tecnolóxica para unha mellor calidade de vida. Baixo esta premisa, preto de 120 profesionais dos servizos de Teleasistencia, de centros de operacións e de persoal técnico instalador participan desde hoxe e ata o xoves nas Xornadas nacionais de Servizos Tecnolóxicos Dixitais de Cruz Vermella Española.
“Os servizos de teleasistencia son fundamentais para a inclusión social, un elemento indispensable para a vida das persoas maiores que permite proporcionar un coidado e acompañamento que, doutro xeito, non terían. Trátase de dispositivos que fan posible saber como se atopan os usuarios e coñecer as súas necesidades de forma instantánea”, explicou a presidenta autonómica de Cruz Vermella en Galicia, Carmen Colmeiro, durante a inauguración das xornadas. “Por iso é tan importante que os profesionais sigades formándovos en encontros como este e que poidades compartir a vosa experiencia traballando por facer mellor a vida das persoas. Porque o voso labor é esencial para estar preto, ser mellores e non deixar a ninguén atrás”, concluíu.
A concelleira de Igualdade, Benestar Social e Participación do Concello da Coruña, Yoya Neira, que deu a benvida aos asistentes en nome da alcaldesa, lembrou a evolución do servizo de Teleasistencia na cidade desde a súa posta en marcha en 1998 – pasando dos vinte usuarios aos máis de 1.600 actuais-. Así, destacou a colaboración do Concello con entidades como Cruz Vermella “para sacar adiante programas sociais de tanto calado” e subliñou “a importancia das novas tecnoloxías no ámbito dos servizos sociais”.
Pola súa banda, o director xeral de Maiores e Atención Sociosanitaria, Antón Acevedo, puxo en valor a vontade da Xunta para situar a tecnoloxía ao servizo do novo modelo de coidados. Neste sentido, subliñou que o Goberno galego está a impulsar a Teleasistencia, da man de Cruz Vermella, para superar os 10.000 usuarios en Galicia ao finalizar o ano.
Asistentes virtuais
Tras a benvida institucional, a experta en márketing dixital, comunicación e innovación, actualmente directora de Innovación en t2ó, Esther Checa, ofreceu a sesión inaugural Asistentes virtuais: casos de uso na relación coa persoa.
