Síguenos


Cruz Vermella proba un novo asistente virtual para persoas con deterioración cognitiva no centro de día de Celeiro

Share on linkedin
Share on twitter
Share on facebook
Share on whatsapp
Share on email

Vixiar o estado de saúde e mellorar a vida das persoas con demencia é a principal finalidade do asistente virtual AVECEN. Cruz Vermella, como membro do Clúster da Saúde de Galicia, está a probalo no Centro de Día para Enfermos de Alzhéimer que ten en Celeiro (Lugo).

 

Esta iniciativa enmárcase dentro do proxecto europeo IN-4-AHA (Innovation Network for Active and Healthy Ageing – Rede de Innovación para o Envellecemento Activo e Saudable), que contribúe á ampliación transfronteiriza de aplicacións probadas e listas para o seu uso na atención sanitaria e social. Concretamente, AVECEN xorde da colaboración, con financiamento público, de varias empresas lideradas por Plexus.

 

Este asistente pretende axudar a previr e autoxestionar enfermidades neurodexenerativas, como o párkinson ou o alzhéimer, que se caracterizan por unha deterioración progresiva das funcións cognitivas. No caso de Celeiro, está a probarse con 15 persoas usuarias con diferentes estadios de deterioración cognitiva.

 

Esta ferramenta tecnolóxica utilízase mediante unha tableta e está pensada como un sistema de monitoraxe e avaliación constante a través da execución de rutinas clínicas, que xeran recomendacións adaptadas ao estado da persoa usuaria, permitindo observar unha evolución lonxitudinal da enfermidade.

 

Con estas 15 persoas, durante o período de proba do asistente virtual (que comezou o 15 de novembro pasado e finalizará o próximo 31 de xaneiro) empréganse, entre outras cousas, cuestionarios e xogos adaptados ao seu perfil. Ademais, é fundamental o apoio das familias, coidadores e profesionais do propio centro e da Unidade de Innovación de Cruz Vermella en Galicia, xa que se trata dunha aplicación dinámica que monitora e avalía, continuamente, a realización de determinadas rutinas.

 

En Cruz Vermella apostamos pola innovación e polo desenvolvemento de proxectos tecnolóxicos que melloren a calidade de vida das persoas máis vulnerables.

 

IN-4-AHA é un proxecto da Unión Europea, financiado por Horizonte 2020, no que participan 10 socios de 7 países europeos entre os que está o Clúster da Saúde de Galicia (CSG).

Share on linkedin
Share on twitter
Share on facebook
Share on whatsapp
Share on email