Clara é unha adolescente de 15 anos chea de soños. É impulsiva, independente e máis fráxil do que parece. Elvira e César rondan os 60, teñen unha filla xa independizada e nesta etapa das súas vidas deron o paso de ser familia acolledora.
Está a ser unha experiencia na que xurdiron algunhas dificultades pero resulta moi revitalizante. O máis importante é que as dificultades se van superando e a oportunidade que lle brindan a Clara si vai cambiar a súa vida, a vida dos tres. Esta é a nova historia ilustrada da campaña de acollemento familiar Querer é Poder.
Unha das finalidades desta campaña é a promoción do acollemento familiar en Galicia e dar a coñecer a realidade de nenos, nenas e adolescentes que como Clara non puden estar cos seus pais e nais porque estes non están nas condicións idóneas para o seu coidado. Por este motivo, hai familias acolledoras como a de Elvira e César que lles ofrecen o seu fogar temporalmente e danlles o agarimo, a protección e os coidados que necesitan mentres a súa familia soluciona os problemas que lle impiden facerse cargo deles e elas.
Cruz Vermella xestiona o programa de Familias Acolledoras da Xunta de Galicia centrándose nos acollementos en familia allea. Actualmente hai máis de 70 menores que están á espera de acollemento, entre eles hai grupos de irmáns e nenos con necesidades especiais.
O primeiro paso para ser familia acolledora é informarse ben e, posteriormente, aquelas persoas que estean realmente interesadas iniciarían o proceso de idoneidade. Cantas máis incorporacións haxa á rede de familias acolledoras de Cruz Vermella en Galicia, máis posibilidades de contar coa alternativa idónea para cada caso.
Vídeo completo da historia neste enlace.
Máis información en acollementofamiliar.gal
