Síguenos


Birane Ngom, de Senegal a Allariz da man do Plan de Emprego

Share on linkedin
Share on twitter
Share on facebook
Share on whatsapp
Share on email

A súa mirada dio todo: transmite esa tranquilidade de quen está en paz consigo mesmo. Hai uns días Birane Ngom volveu a Cruz Vermella tras máis de tres anos nos que, a base de esforzo, a súa vida deu un cambio total. E fíxoo para traer un donativo de 400 euros froito do seu talento como carpinteiro e o seu profundo sentimento de agradecemento con todas as persoas que o axudaron.

 

“Tiven que esforzarme moito para chegar a España e manter á miña familia, porque en Senegal as cousas non van ben. Non esquezo nada do que me pasou, o que sufrín, as alegrías, quen me ten axudado… E se vexo que alguén o pasa mal, eu pásoo mal”, explica.

 

Di que chega a final de mes coa súa conta baleira, porque co seu soldo mantén á súa familia en Senegal. A súa responsabilidade e empatía fan deste senegalés de 34 anos todo un exemplo de actitude.

 

“Na vida nunca sabes o que pode pasar mañá, pero sobre todo hai que respectar á xente, aprender a convivir, e cando se pode axudar hai que axudar, é o que me dixo a miña nai e o que tento facer”, explica.

 

Contacto con Cruz Vermella

 

A súa historia en España comeza cando hai cinco anos chega desde Dakar a Madrid. Alí tivo o seu primeiro contacto con Cruz Vermella, que lle axudou durante unha semana ata que veu a Ourense, onde lle esperaba o seu tío Bay. Que o irmán pequeno da súa nai levase 10 anos en Ourense dáballe seguridade e esperanza. El foi o seu piar e o seu guía: explicoulle que o primeiro que debía facer era aprender o idioma, por iso empezou a ir a clases de español a Cáritas. A súa intención sempre foi traballar en carpintería porque é a súa profesión, con 12 anos de experiencia e formación regrada no seu país. Pero nese momento non había cursos no sector, polo que xa desde o INEM enviárono ao Plan de Emprego de Cruz Vermella.

 

É aquí cando comeza un curso de limpeza, confiando en Cristina, técnica do proxecto, que lle asegura que lle vai a ir ben. E así, tres meses de formación e prácticas non laborais en Ferrovial convertéronse nun emprego para Birane, un primeiro traballo que lle dá a oportunidade de cambiar a súa vida, traballando nos servizos de limpeza do Complexo Hospitalario Universitario de Ourense.

 

Tanto persoalmente como profesionalmente é moi valorado, e entre as súas compañeiras estaba María, a muller de quen hoxe en día é o seu xefe en Ebanistería Allariz. Ela, ao saber da súa vocación de carpinteiro envíalle o currículo de Birane ao seu marido, César. Ao principio houbo que superar certas dificultades, porque non tiña como trasladarse de Ourense a Allariz, pero unha vez máis puido empezar a traballar alí grazas ao apoio dun compañeiro que o levaba cada día.

 

Unha árbore moi especial

 

Este Nadal foi moi especial para a empresa, porque Birane fixo unha preciosa árbore de madeira con listóns de diferentes tipos para a súa tenda de mobles. O éxito foi tal que lle pediron que fixese outro para regalar ao Hospital, onde coñecera a María. “Iso é algo que non esquezo”, di, e por iso púxose a traballar fóra de horario laboral nesta árbore para o quirófano. Novamente gustou tanto entre o persoal que lle encargaron outro; chegado este punto César propúxolle aceptar o encargo pero sen cobralo, e se ao final a doutora que o encargaba pagáballe algo, entón doaríase a Cruz Vermella. Así foi como chegou de novo á Organización.

 

Como nos mostra Birane coa súa propia historia, a vida é dar e recibir. Birane hoxe vive independizado, ten carné de conducir e está a homologar o seu título de formación profesional. Di que está orgulloso, contento e moi agradecido porque lle axudaron moito, pero sen dúbida detrás hai un gran traballo diario, moito esforzo persoal e grandes valores. Persoas como Birane fan da Humanidade non só un principio, senón tamén un fin.

Share on linkedin
Share on twitter
Share on facebook
Share on whatsapp
Share on email