Preto dun centenar de persoas voluntarias da Asemblea Provincial de Cruz Vermella na Coruña participaron na undécima edición da Escola de Outono, organizada anualmente co obxectivo de proporcionar ferramentas e estratexias vitais para o día a día nas tarefas de voluntariado. Celebrada nas instalacións do Seminario Menor de Santiago de Compostela, a xornada contou con diferentes talleres prácticos, conferencias e dinámicas grupais.
A primeira Escola de Outono celebrada tras o parón ocasionado pola pandemia virou en torno ao Dereito Internacional Humanitario, un tema imprescindible ante a realidade de conflitos armados como o que ten lugar en Ucraína e en liña coa resposta de Cruz Vermella á chegada de persoas que solicitan asilo no noso país.
Entre os talleres prácticos desenvolvidos ao longo do día, o voluntariado tivo a oportunidade de coñecer máis en detalle a loxística en emerxencias, o tratamento das emocións das persoas que demandan axuda na organización, a adaptación das actividades de lecer á diversidade funcional ou a intervención integral con persoas. Os participantes, procedentes de diferentes asembleas de Cruz Vermella na provincia, asistiron, ademais, a charlas acerca da propia cultura humanitaria da entidade.
Cruz Vermella conta con preto de 2000 persoas voluntarias na provincia coruñesa, entre as que se atopan preto de 1200 desempeñando a súa actividade de forma regular.
