Síguenos


A Cátedra Cruz Vermella – USC pon en valor a necesidade e a influencia positiva do contacto social na calidade de vida das persoas maiores

Share on linkedin
Share on twitter
Share on facebook
Share on whatsapp
Share on email

Fomentar a investigación e a transferencia de coñecemento sobre as persoas maiores é a finalidade da Cátedra Institucional Cruz Vermella para a mellora da calidade de vida das persoas maiores. Hoxe tivo lugar en Santiago de Compostela a presentación dos proxectos destacados do seu Plan de Actividade de 2022 nun acto no que interviñeron o vicerreitor de Transformación Dixital e Innovación da Universidade de Santiago de Compostela, Gumersindo Feijoo Costa, a presidenta de Cruz Vermella en Galicia, Carmen Colmeiro Rojo, o director da Cátedra, Arturo X. Pereiro Rozas, e o codirector, Onésimo Juncos Rabadán.

 

A soidade non desexada, o bo trato, a accesibilidade e usabilidade das tecnoloxías ou os aspectos determinantes na permanencia no domicilio son algunhas das liñas de traballo que estarán presentes nas actividades deste ano, entre as que se atopan varios estudos e xornadas, así como un concurso de curtametraxes ou a primeira edición dos Premios a Traballos de Fin de Grao (TFG) e Fin de Máster (TFM) da Cátedra Cruz Vermella – USC.

 

Recomendacións para mellorar a atención

 

Por outra banda, celebrouse a mesa redonda “A calidade de vida das persoas maiores en Galicia despois da pandemia. Leccións aprendidas” organizada pola Cátedra para establecer, por unha banda, conclusións sobre como afectou a situación sanitaria e social dos dous últimos anos a este grupo de idade e sobre as necesidades e apoios que tiveron e, por outra banda, para establecer recomendacións para unha mellor atención e intervención.

 

Este debate estivo moderado por Trindad de Lorenzo, secretaria técnica da Cátedra, e participaron Fidel Martínez Roget, profesor da Facultade de Economía da USC, que centrou a súa intervención no “Estudo sobre o impacto da Covid-19 na calidade de vida das persoas maiores”; Carlos Dosil Díaz, profesor da Facultade de Psicoloxía da USC, falou do impacto psicolóxico e funcional do confinamento en adultos maiores que viven en residencias recollido no estudo “ RESICOVID”; e Montserrat Sánchez-Agustino, subdirectora da Cátedra de Cronicidade da USC, comentou o proxecto “ HIGEA”, cuxo obxectivo foi e é conectar aos pacientes con  COVID ingresados nun hospital coas súas familias.

 

Unha das cuestións destacadas que se quere poñer en valor desde a Cátedra Cruz Vermella – USC, tendo en conta os diferentes estudos e proxectos presentados, é a influencia positiva e determinante que durante a pandemia tiveron o contacto social, xa sexa en persoa ou vía en liña, e a percepción de apoio da contorna para as persoas maiores que viven tanto en domicilios como en residencias. É fundamental ter isto en conta á hora de expor e realizar proxectos dirixidos a mellorar a calidade de vida deste colectivo.

Share on linkedin
Share on twitter
Share on facebook
Share on whatsapp
Share on email